नागपूर: खासदार सांस्कृतिक महोत्सवाच्या उपक्रमांतर्गत नागपूरच्या मध्यवर्ती कारागृहात महिला पोलिस अधिकारी आणि कर्मचारी, तसेच बंदी महिलांनी एकत्र येऊन उत्साहात मेहंदी महोत्सव साजरा केला. या कार्यक्रमात महिलांनी पारंपरिक पोशाख परिधान करून एकमेकांच्या हातावर मेहंदी रेखाटली आणि सांस्कृतिक आनंद अनुभवला.
या उपक्रमाचा मुख्य उद्देश महिला पोलिस कर्मचाऱ्यांना दैनंदिन ताणतणावातून विश्रांती देणे, सकारात्मकता वाढवणे आणि सांस्कृतिक एकात्मता सशक्त करणे होता. कार्यक्रमात कलागुण प्रदर्शन आणि सांस्कृतिक कार्यक्रमांनी आनंदाचे वातावरण निर्माण केले.
खासदार सांस्कृतिक महोत्सव समितीच्या पुढाकाराने आयोजित या महोत्सवामुळे कारागृहातील महिला पोलिस दलाला नवचैतन्य मिळाले. उपस्थित अधिकाऱ्यांनी या उपक्रमाचे कौतुक करत, असे मत व्यक्त केले की सांस्कृतिक कार्यक्रम महिलांना मानसिक व सामाजिक ऊर्जा प्रदान करतात.
कार्यक्रमाला खासदार सांस्कृतिक महोत्सव समितीच्या अध्यक्षा कांचन गडकरी प्रमुख पाहुण्या म्हणून उपस्थित होत्या.
